Aebiroad

Blööterli und Tröpfli

Es Söifeblööterli, es Wassertröpfli,
zwei stolzi Glänzer, hell im Suneschii.
Und beidi jetzt im schönschte Sunntiggwand,
mit Schimmer, rägebogefarbig tänzig,
mit Glimmer, hosebodenartig glänzig.
O Früëligssune, giengtisch nië verbii
da am Spaliër, da a de Schöpfliwand.

So stolz sind beidi und so ewig sicher.
Git s ächt fürs Funkle hüt en Siegerpriis?
Für schtarchi Blööterli und au für zäächi Tröpfli,
wo niëmer glaubti, s chönnt ’ne öppis ggscheh,
wo niëmer ahnti, s chönnt bald öppis gèè.
Au grosse Glänzer laufts mal ziemlich fies.
S wird au passiere a de Wand vom Schöpfli.

Wer isch de Schönschti? Glänzed, hopp!
Scho z schpaat, …vergiss es, …plupp! …plopp!

.

Räbsorte

Me kännt sitt villne hundert Jahre
Räbsorte, d Viilfalt isch so riich
Pass uuf, uf eimal muesch erfahre
Dass s mängisch Näme sind fürs Gliich

Heisst s i der Oschtschwiiz Blauburgunder
So isch s im Wältschland Pinot noir
Am Zürisee gitts druus, o Wunder
En fruchtig-feine Klevner gar

Chiavenna heïg ’mal Cläven gheisse
De Jürg Jenatsch heïg ase gsäit
Do heïgets bim s Bergell-uuf-Steisse
Vältliiner-Stöck uf Stääfe träit

Us dere Sorte, ohni z bschiisse
Da gitt s sogar no Fäderewiisse

.

Vogelbeeribaum

Vo dene villne Ziërbaum-Arte
Sind d Vogelbeeribäum im Garte
E bbsundri Ziër fürs Huus
Dië Frücht wo rot und orangsch lüüchted
Öbs riif sind oder no chli brüüchted
Gsehnd fasch chli künschtlich uus

Ich käne doch dië Bletterform
Dië isch susch bi de n Esche d Norm
Wië Fädere vom Pfau
Drum heisst dä Baum au Eberesche
S git Deschtilaat i Liggörfläsche
Und Gomfi gäbis au

Me ghört no, dass d Botanik lehri
Das seiged Öpfel und kä Beeri
Für d Vögel gar kän Hit
Au d Eber – säit de Fritz bim Schieber -
Dië hättid frischi Eichle lieber
Und schickt es Blinzle mit

.

Muggeschwarm

En Sunestrahl dringt hell und warm
Dur d Zwiig vor min’re Naase
Drinn tanzt vergnüegt en Muggeschwarm
Wiè Derwisch in Ekstase.

Vil helli Pünktli schwired wild
Söll ich si ächt verjaage?
Zmitts dure, ohni Abwehrschild
Risggiëre Chopf und Chraage?

Wèr stört jetzt wèn? Sie miich? Iich sie?
Ich glaub, ich gibe naa.
Dèè Tanz us Freud am Suneschii
Söll unggschtört wiiter gah.

.

Ggwitterstimmig

Ggwitterstimmig, Summerhimel
Wiissi Wulchetürm verlaufed
In e tunkelgraui Tecki.

Stimmigs Wätter, Summerstimmig
Jetz en frische Wind us Weschde
I diè tüppig Schwüüli.

Lèèrts ächt uus? Und tuets ächt wüescht?
Hoffentli nu nöd so struub.
Gahts a eusne Hüüsere

Vilicht verbii?
Wänns nu nöd chunnt
cho hagle!

.