Vogelbeeribaum
22. November 2009 von Hans
Vo dene villne Ziërbaum-Arte
Sind d Vogelbeeribäum im Garte
E bbsundri Ziër fürs Huus
Dië Frücht wo rot und orangsch lüüchted
Öbs riif sind oder no chli brüüchted
Gsehnd fasch chli künschtlich uus
Ich käne doch dië Bletterform
Dië isch susch bi de n Esche d Norm
Wië Fädere vom Pfau
Drum heisst dä Baum au Eberesche
S git Deschtilaat i Liggörfläsche
Und Gomfi gäbis au
Me ghört no, dass d Botanik lehri
Das seiged Öpfel und kä Beeri
Für d Vögel gar kän Hit
Au d Eber – säit de Fritz bim Schieber -
Dië hättid frischi Eichle lieber
Und schickt es Blinzle mit
.
Isch es schöns Gedicht worde! Luschtig findi s’ Wort GOMFI. Würd gern emal vo dem Öpfeluufstrich probiere. Wo chunnt mer das ächt über? Am eheschte wo mögli i somene Bio-Soja-Chörnli-Tofu- und Velochlammere-Lade… Usser de Schnaps. De git’s aber bestimmt im Delicatessa am Löweplatz z’ Ziiiiri!
Erneut wunderbar! Dass allerdings die Vögel die Beeren-Äpfel nicht so mögen, ist mir neu. Seis drum: Das Blinzeln beim Schieber würde auch grössere Fragwürdigkeiten rechtfertigen.